Mae ein gwaith elusennol yn gysylltiedig â'n digwyddiadau craidd. Ceisiwn wella bywydau unigolion trwy gyfrwng ein cyfranogiad cymunedol

Cefnogaeth i elusennau 

Ein cyfrwng ar gyfer cefnogi elusennau yw'r Gronfa Carreg Lam. Lansiwyd y Gronfa ym mis Ionawr 2001 ac yn ystod y flwyddyn gyntaf bu'n bosibl i ni gefnogi 58 o brosiectau ledled y DG, pob un yn helpu oedolion i wella eu sgiliau ysgrifennu. Roedd y prosiectau'n ymwneud ag amrediad eang o anghenion, o'r pethau sylfaenol i ysgrifennu creadigol am bleser. Gwnaed llawer o'r prosiectau gan grwpiau bach lleol yn ymateb i angen yn eu cymuned eu hunain, Gyda'n cymorth ni, roedden nhw'n gallu gweithredu eu cynlluniau a gwneud gwir wahaniaeth.

Gydag ystadegau'r llywodraeth yn datgelu fod dros 7 miliwn o oedolion yn y DG yn dioddef o broblemau llythrennedd sylfaenol, rydym yn dal i gefnogi llythrennedd trwy gyfrwng Cronfa Carreg Lam am y drydedd flwyddyn. Yn 2003, bydd 45 o brosiectau gwahanol wedi cael cyfran o'r £250,000 yn y Gronfa.

Mae'r gronfa ar gyfer eleni wedi cau erbyn hyn. Os hoffech gofrestru ar gyfer Cronfa Carreg Lam 2004, ysgrifennwch at y cyfeiriad isod neu ebostiwch steppingstonefund@royalmail.com.

Cronfa Carreg Lam
148 Old Street
LLUNDAIN
EC1V 9HQ
Ffôn: 020 7250 2243

Rydym yn croesawu galwadau TextDirect BT. Mae'r ffurflen gais ar gael mewn ffurfiau gwahanol ar eich cais, e.e. mewn print bras, mewn Braille ac yn Saesneg.

Yn ystod 2003 rhoddodd y Post Brenhinol dros £200,000 hefyd i brosiectau elusennol yn rownd gyntaf rhoddion wedi'u hariannu o werthu'r stampiau arbennig a gyhoeddwyd adeg marwolaeth EM y Frenhines Elizabeth y Fam Frenhines yn 2002. Mae pob un o'r 20 o brosiectau a ddewiswyd yn cael ei reoli gan elusen yr oedd y Fam Frenhines yn gysylltiedig ag ef fel noddwr.

Cyfrannu Cyfran o'r Cyflog 

Bob blwyddyn mae miloedd o'n gweithwyr yn cyfrannu at elusennau o'u dewis trwy gyfrannu cyfran o'u cyflog mewn cynllun sy'n cael ei weinyddu ar ein rhan gan yr Ymddiriedolaeth Elusennau. Y llynedd cyfrannodd ein gweithwyr £2.5 miliwn, sy'n golygu fod y cyfanswm a gyfrannwyd oddi ar ddechrau'r cynllun 12 mlynedd yn ôl yn £21 miliwn.

Cefnogi elusennau trwy ffyrdd ymarferol 

Mae cyfrannu at brosiectau penodol trwy gyfrwng Cronfa Carreg Lam wedi bod yn effeithiol iawn, ond rydym yn sylweddoli hefyd na all elusennau fodoli ar gyfraniadau yn unig. Mae disgwyl cynyddol iddyn nhw fod yn debycach i fusnes, a chyda thros 200,000 o elusennau cofrestredig yn y DG maen nhw'n aml yn cystadlu yn erbyn ei gilydd. Mae gwella hyfforddiant a sgiliau yr un mor bwysig i elusennau ag i unrhyw sefydliad arall.

Prosiect Arweinyddiaeth Syr Christopher Harding
Roedd Syr Christopher yn arweinydd busnes ysbrydoledig a oedd wedi ymrwymo i helpu pobl i ddatblygu eu holl botensial a galluogi sefydliadau i wynebu eu cyfrifoldebau cymdeithasol ac amgylcheddol. Cafodd y rhaglen Arweinyddiaeth, sy'n ceisio rhoi cyfle ar gyfer datblygu i arweinwyr y dyfodol, ei chreu er anrhydedd i Syr Christopher ac mae'n cael ei chefnogi gennym ni a thri chwmni arall yr oedd gan Syr Christopher gysylltiad agos â nhw.

Un o elfennau'r rhaglen yw cynnig 100 awr o ymgynghoriaeth i sefydliad yn y sector gwirfoddol i'w helpu gydag amryw o bethau megis gwneud strategaethau codi arian yn fwy effeithiol, datblygu strategaeth farchnata a chyfathrebu lwyddiannus, a gweithredu a gwneud y defnydd gorau o dechnoleg gwybodaeth. I lawer o sefydliadau gwirfoddol, fe fyddai ymgynghoriaeth fel hyn y tu hwnt i'w cyrraedd; felly, yn ogystal â chynnig profiad ymarferol i gyfranogwyr, mae'n adnodd gwerthfawr i'r sefydliad.

Gall sefydliadau dielw, yn ogystal â'r rhai o'r sectorau cyhoeddus a phreifat, ddefnyddio'r rhaglen hon am bris rhatach oherwydd cefnogaeth y pedwar cwmni nawdd: BNFL, BT, y Post Brenhinol ac United Utilities.